Legenda Batu Badaong

Tamang –tamang kali ini beta posting tulisan ini dalam bahasa melayu Maluku Ambon jua e, kemarin-kemarin sudah posting dalam bahasa Inggris deng Indonesia, sekarang beda. Seng apa-apa to?. Jang tatawa ini budaya , senyum saja jua J.

Tamang-tamang tahu Legenda Batu badaong ka seng?. Seng Tahu?. Mari beta carita.

Dolo-dolo ada mama satu hidop dengan antua pung anak laki-laki ini ada 3 orang. Yang pertama ini si Sulung, yang kedua Siantar dan yang terakhir namanya Si Bungsu. Dong tinggal di pinggir pantai. (itu bukan nama cumin for membedakan dong 3 sa dalam carita ini). Yang Sulung ini dia paling bae. Dia rajin suka bantu dia mama kerja apa saja. Pekerjaan orang perempuan jua dia kerja akang. Luar biasa. Sedangkan yang Siantar dengan Bungsu ini dong dua paleng suka berkelahi. Setiap hari baku pukul. Cuma par sesuatu hal yang kecil-kecil saja kayak manggurebe mainan ka seng minta beli ini ,minta beli itu kalau seng bali demo dengan gaya tar mau makang ,tar mau tidur siang, segala macam yang aneh-aneh.

Suatu kali bagini, dong mama ada mau biking makanan for dong makan. Tapi pas mama lia, ya…. beras su seng ada lai. Su habis. Lalu akhirnya mama pi kaluar ,for mau pi cari beras ,antua bawa ikan for tukar dapat beras. Sebelum antua kaluar ,antua sempat kasih pesan for dong,”Ana-ana jang kaluar e, makang sagu dolo sambil tunggu mama. Sagu 3 buah itu dong baku bage e. Satu orang dapat satu. Seng boleh kaluar kalo su sore mati glap (senja hari menjelang malam) tinggal di dalam rumah saja e tunggu mama. Siantar deng Bongso (bungsu) dengar kaka e jang melawan kaka. Kaka jaga dong dua e. Mama pigi dolo”, mama bilang lalu kasih tinggal dong 3 di dalam rumah.

Dong 3 barmaeng di dalam rumah itu, pas dong 3 rasa lapar oh sudah, sagu 3 buah itu Sulung kasi 1 orang satu, tapi pas su abis makang dong punya satu-satu, yang bungsu manangis kata masih lapar. Akhirnya Sulung mengalah lalu kasi dia punya ,dia bage dua sagu itu lalu kasi par Siantar dengan bungsu. Habis. Sulung jua lapar. Tapi dia tahang-tahang dengan minum air putih hangat saja. E pas su lama su soree mati glap, Siantar dengan Bungsu su pastiu(bosan) dalam rumah. Dong mau pigi barmaeng di luar. Sulung larang teringat dong mama pung pesan. Sulung tinggal larang dong dua sampe dukung dong 2 bawa masu ka dalam rumah. Tapi dong seng mau dengar. Sulung pukul dong pung kaki-kaki ,tapi dong seng pastiu. Paleng kapala batu ka seng?. Dong tetap pigi kaluar barmaeng di pinggir pante(pantai).

Lalu akhirnya pas dong ada asyik barmaeng-barmaeng bagini, dong mama pulang pas-pas lia dong ada barmaeng di luar di pinggir pante. Astaga dong mama paleng marah dengan dong pung kalakuang itu. Awalnya dong mama panggel masu sudah, jang barmaeng lai. Dong kaka jua su panggel-panggel sampe sudah. Tapi dong dua ini bungsu dengan siantar barmaeng tarus. Akhirnya mama seng kuat tahang lai, mama bilang, “Oh kamong seng mau dengar beta lai, kalo bagitu beta pigi jua”. Mama lalu bajalang maso ka aer laut ,bajalang tarus sampe ka bagiang yang dalam di sana. Sulung bilang mama jangan ,jangan sampe minta-minta ampong. Siantar lia dia mama pigi ka aer laut kadalang. Dia stop barmaeng ,Bungsu lai. Dong dua manangis minta ampong tapi su terlambat dong mama seng mau bale lai. Pas dong mama su sampe di aer laut yang paleng kadalam langsung ada batu satu kaluar lalu dong mama naik duduk di atas akang ,lalu tiba-tiba dong mama masuk dalam batu itu. Lalu batu itu juga iko masuk ka dalam aer laut. Dong 3 manangis, minta-minta ampong. Tapi samua su terlambat.

Pesan: jang malawang mama kalo mama bilang for bae ,dengar, kaka bilang yang baik dengar. Iko supaya jadi bae. Kapala batu buang akang.